اليوم كنت عند جارتنا الأمريكيه ، تشتغل هي و زوجها بالرياض و عايشين هناك لهم فتره ، هي و عيالها الاثنين "ولد وبنت" اعمارهم الظاهر بين ٩ و ١٠ جايين اجازه لأهلهم فتره و بيرجعون السعوديه مره ثانيه بحكم عملهم ، هي و عيالها يعشقون السعودية بشكل صدمني ، انصدمت كيف ان عيالها زعلانين و يقولون انهم يبون يرجعون ل ال"هوم" ، وطنهم ، السعودية
ما انكر اني كنت مفهي يوم سمعتهم يسمون السعوديه "هوم" و كيف انهم صاروا يفضلونها عن امريكا و هالشيء خلاني افكر بـ وش هو مفهوم الوطن ؟
كثير من الناس يؤمنون ان الوطن هو اللي يقدم لك و يرعاك مهوب اللي يرجع اصلك منه ، انا شخصياً ضد هالفكرة و اعتبر وطني هو جزيرة العرب مهما كان هالوطن فاسد ، لكن حسيت اني بديت اغير افكاري *مثل ماغيرت كثير من افكاري بالاربع اشهر الاخيره* يوم دريت كيف كان حالهم قبل لا يروحون السعوديه وكيف السعوديه غيرت حياتهم بشكل مفصلي و حولتهم للأفضل
الأم و زوجها كانوا عاطلين في امريكا و ماكانوا بالحالة المادية اللي هم فيها الأن ، فجاتهم فرصة العمل بالسعودية وبالفعل السعودية قدمت لهم وظيفه ، عكس اللي سوته لهم بلدهم بأنهم مالقوا وظيفه فيها و كانوا عاطلين عن العمل فصاروا يقدرون السعوديه و يحبون العيشه فيها لأنها ببساطه قدمت لهم حياة
بغض النظر عن انهم امريكان ، مهما كانت الجنسية ، كثير من الناس من شتئ الجنسيات هاجروا لدول ثانيه لأنها قدمت لهم فرص افضل و عاشوا فيها كل حياتهم و تربوا فيها عيالهم
فهل مفهوم الوطن الحقيقي هو الوطن اللي يخدمك ؟ او الوطن اللي ترجع منه مهما كانت اثاره عليك ؟ اتوقع هذا السؤال بيبقى بعقلي لفتره طويله
